Viser til spørsmåla/kommentarane som kom inn her på bloggen min etter gårsdagens nettmøte hjå Dagbladet.no. Håpar eg har teke med det viktigaste. Uansett, her kjem mine svar.
Strider ikke det med deres markedsliberale ideologi å være for fri fildeling?
Nei. Unge Venstre meiner framleis at det kun er opphavspersonen som skal ha kommersielle rettar, dvs. kunne tene pengar på produktet.
Er Venstre for tyveri av sparepærer når dere er for fri fildeling?
Nei, sjølvsagt er vi ikkje det. Og eg er ganske sikker på at om eg i ein annan samanheng hadde samanlikna det kulturbransjen driv med med sparepæreproduksjon, så ville det blitt teke ille opp.
Hvordan mener du at artistene skal tjene penger på fildeling?
Dersom kunstnarar, musikarar og forfattarar lir store økonomiske tap på grunn av ein friare informasjonsflyt, så må vi sjølvsagt kompensere for det. Det har vi råd til. Noreg bruker mykje meir offentlege pengar på bibliotek for fritt å distribuere litteratur enn det platebransjen tener på musikk (og likevel kjøper folk bøker, og ingen har endå skulda biblioteka for å truge opphavsretten til forfattarane.)
Fakta er at musikkbransjen slit med å kome med truverdig bevis på at fildeling steler inntekter frå kunstnarane. Ein grunn til det er som det har blitt skrive av andre at mange lastar ned songar som dei elles ikkje ville kjøpt. Bransjekampanjen Piracy Kills Music påstår at dei har overveldande bevis på at tapa er store, men viser sjølv ganske lemfeldig omgang med opphavsretten, når dei ikkje tek seg bryet med å fortelje kor dei har tala sine frå. Bransjen sin eigen salsstatistikk viser noko heilt anna. Om ein reknar med det lovlege salet av musikk over internett og til mobiltelefon, så vart det seld fleire musikkeiningar i 2006 enn nokon gong tidlegare. Ei studie frå Harvard Business School frå 2004 klarte dessutan ikkje å finne nokon som helst samanheng mellom aukande ulovleg fildeling og utviklinga i musikksalet.
Det er viktig å understreke at folk er viljug til å betale for musikk sjølv om ein har moglegheit for å laste ned musikk gratis frå nettet. Det er nok å minne om at iTunes Music Store hadde rundt 200 millionar nedlastingar i løpet av sine tre første leveår, og det til tross for at musikkfilene her var utstyrt med brukarfiendtlege kopisperrar.
Hvor mange tror du forøvrig kan leve av "berømmelsen og konsertinntekter"?
Den største delen av inntektene til musikarar vil i framtida i støre grad kome frå andre stadar enn direkte sal av musikk, dvs. konsertbillettar, merchandise, reklame, låtar spelt på radio/TV o.l. Ein kan like det eller ikkje, og alt var sikkert mykje betre i gamle dagar, men ein skigard kan’kje vare evig, veit du.
Elles trur eg at fleire har moglegheit til å leve av musikken på grunn av fildeling. Tidlegare var ein avhengig av å sleppe gjennom nålauget til plateselskapet for å nå ut med musikken sin. Med fildeling kan kven som helst nå ut til heile verda ved å laste opp musikken sin på nettet.
Eller var det stemmesanking blant kidsa som var det viktige likevel?
Nei. Vi er eit parti som seier det vi meiner.
